مانگی ڕەمەزان، مانگە پڕ لە خێروبەرەکەتەکەی دونیای ئیسلام
ئەم مانگە، مانگی نۆهەمی مانگە عەرەبییەکانە و ئەکەوێتە نێوان مانگی شەعبان و مانگی شەووال.
وشەی رەمەزان واتە بەردی گەرم و داخ، یان واتە سووتاندن کە بە واتای سووتاندنی گوناهەکانە.
خوای گەورە لەم مانگەدا، ڕۆژووی لەسەر ئێمە واجب کردووە و ڕەمەزان بووە بە مانگی ڕۆژوو.
قورئان دەفەرمێ: ئەی کەسانێ کە ئیمانتان هێناوە، ئێمە ڕۆژوومان لەسەر ئێوە واجب کردووە، وەک چۆن لەسەر ئوممەتانی پێشوو ڕۆژوومان واجب کردبوو.
ڕۆژوو یەکێکە لە پێنج روکنەی ئیسلام و فەرعی دینی ئیسلام یەکێکیان ڕۆژووە.
قورئان دەفەرمێ: مانگی پیرۆزی ڕەمەزان ئەو مانگەیە کە قورئانی تێدا نازڵ بووە… هەرکەس ئامادەی ئەم مانگە بوو،«فلیصمە…» با ڕۆژووی تێدا بگرێ.
پێغەمبەری خوا فەرموویەتی: لەم مانگەدا درگای بەهەشت ئەکرێتەوە و درگای جەهەننەم دادەخرێ.
پێغەمبەری خوا فەرموویەتی: هەرکەسێ لەم مانگەدا بە ئیمانەوە بەڕۆژوو بێ، گوناهانی لەوەو پێشی هەمووی پاک دەبێتەوە.
هەروەها پێغەمبەری خوا فەرموویەتی: مانگی ڕەمەزان؛ سەرەتاکەی ڕەحمەتە و ناوەڕاستەکەی مەغفیرەتە و ئاخرەکەشی نەجاتبوونە لە ئاگری دۆزەخ.
هەندێ لە واجیبات و پێویستییەکانی ڕۆژوو
یەکەم : پێغەمبەری خوا فەرموویەتی: هەموو کردەوەیەک بە نییەتەوە بەسراوە. بۆیە؛ واجبە هەموو شەوێ، لە دوای بانگی مەغریبەوە تا کاتی بانگی بەیانی نیەتی ڕۆژوو بێنین./ مینهاجی ئیمام نەوەوی
شێوازی نییەت بەم شێوەیە: نییەتم هەیە بەیانی بەڕۆژووم، ڕۆژووی فەرزی مانگی ڕەمەزانی ئەمساڵ، ئەیگرم بۆ خوا./ مینهاجی ئیمام نەوەوی جڵدی دووهەم
دووهەم: درووستە لە بانگی مەغریبەوە تا کاتی بانگی بەیانی هەموو ئەو شتانەی بە ڕۆژا لێمان قەدەغە کراوە، ئەنجام بدەین.
سێهەم: واجبە کاتێ بانگی بەیانیدا تا کاتی بانگی ئێوارە، هیچ نەخۆین و هیچ نەخۆینەوە.
کوفر کردن و جیماع کردن و خۆڕشاندنەوە و حەیز ڕۆژوو بەتاڵ دەکەنەوە / مینهاجی ئیمام نەوەوی.
ئەگەر کەسێ نوێژ نەخوێنێ و ڕۆژوو بگرێ، ڕۆژووەکەی درووستە و دائەمەزرێ.
کەسی مەشرووبخۆر و تاوانبار، ڕۆژوویان دروستە و دائەمەزرێ.
ئەگەر کەسێک لەبیری چوو ڕۆژووە و شتێکی خوارد، ئەگەر کەسێ بەڕۆژا دەرزی بوەشێنێ، کەسێ عەتر بدا لە خۆی ئەوا ڕۆژووەکەیان بەتاڵ نابێتەوە. /مینهاجی کوردی، هەرتەلی
سوننەتە بۆ ڕۆژووگرتن، پارشێو بکەین و لە پارشێوکردنیشدا بۆ ئێحتیات واباشە دە دەقە پێش بانگی بەیانی دەس لە خواردن و خواردنەوە هەڵبگرین.
سوننەت وەهایە لە رۆژدا قورئانی زۆر بخوێنین و زیکر و یادی خودا زۆر بکەین و تەئکیدێکی زۆر لەسەر پاڕاناوە کراوە.
سوننەتە زمانی خۆمان، لە درۆ و لە غەیبەت و لە قسەی ناڕەوا بپارێزێن./ مینهاجی ئیمام نەوەوی جڵدی دووهەم
سوننەت وەهایە شەوانە دوای نوێژی عیشا، بیست ڕکات تەراوێح بخوێنین، ئەگەر کرا بە جەماعەت و ئەگەریش نەکرا، هەرکەسەو بۆ خۆی ئەتوانێ بە تەنها نوێژی تەراوێح بخوێنێ.
سوننەت وەهایە لەکاتی بەربانگدا، زوو بەربانگ بکەین./ مینهاجی ئیمام نەوەوی جڵدی دووهەم
سوننەتە بە خورما ڕۆژوو بشکێنین و ئەگەر نەبوو بە ئاو. بۆ کاتی بەربانگیش سوننەتە بڵێین : اللّهمَّ لَكَ صُمْتُ و عَلی رِزْقِكَ أَفْطَرْتُ/
ذَهَبَ الظَّمَأُ و ابْتَلَّتِ الْعُروقُ و ثَبَتَ الأَجْرُ إِنْ شَاءَ اللهُ تَعَالی/ سونەنی ئەبوو داود
دەق: سوهەیب عەلی
